BULPI TE KISIA LEH

BULPI TE KISIA LEH

Bulpi te ki susia leh midik ten bang cih thei ding ahi hiam? Late 11:3

A ki piang sak na khempeuh bulpi nei in ki bawl hi. Hih leitung zong huih awngthawl lak ah kikhai tawh a ki bat hang, Pasian in bulpi nei-a abawl ahihi. (Job 38:4). Kha thu zong bulpi/tawphah nei-a kilam ahihi. Tua bang mah in kipawlna tuamtuam te zong bulpi nei vive ahihi. Bulpi cih ciangin, thuletcian, thubulphuh cih leh, tua thubulphuh a lenkip makai te cih nam nih in om hi.

Khristian upna ah “Bulpi” Jesu Khrist leh a kammal hi-a, hih pen a kikhel ngeilo/ki sia theilo ahihi.( Heb 13:8;Mtt 24:35). Bulpi dang khat pen, “Makaite” ahihi. Hih makai te nam 5 in kimu hi: Kamsangte, Sawltakte, Evangelist te, Pastor te leh Laihilh sia te ( Eph 4:11). Lai Siangtho lui ah, Kamsang, siampi leh Kumpi te a bulpi uh ahihi. Lai Siangtho lui ah hih makai thum te kisia leh a nungzui, a khutnuai gammi te zong kisia pah uh hi. Lai Siangtho thak hun ah zong a tunga makai nam nga te kisia leh pawlpi kisia ding ahihi.

Bulpi ki susia cih ciangin: Upna pai khialna, Nuntakna manlohna cih te ahihi. Pawlpi sungah siapa/makai te upna paikhial leh pawlpi mite zong paikhialh pih ding hi. Anun takna (character) kisia leh mite zong kisia ding hi. Inn sungah zong nu-leh-pa nuntakna kisia leh tate kisia ding hi. Nitum na lam gamte ah naupang kisia te a tamzaw inn sungah nu-leh-pa kilemlo, kikhen te hangin piang hi. Naupang khatin, kamtawh genna sangin akiim a amuh uh thu tawh nungta zaw hi cih mipil ten gen hi.  tua ahih man Naupang te in inn sungah “thunei” et-the ding (authority figure) kisam hi.

Ka gen nop bulpi in. “Pasian pawlpi ah makai na hi-a, business (sum bawlna) khat ah makai na hi-a, leitung kumpi nasepna khat peuhpeuh ah makai na hi a, inn sungah nu-leh-pa dinmun om na hi zongin, nang pen na theih loh kal in mikhat in/na tate/ na nungzui ten hong et-teh gige ahih lam thei in”, ci-in Dr. J.R Clinton[1]  in gen hi. Midang te zawhna pen, (sum tawh huhna, ngaihsut piakna, palai sepna (sponsor) cih bang tuamtuam om a, tua te lak-ah mi te et-teh limpha suahna tawh zawhna (influence) sawt ki mang pen hi.

[1] Dr. J.R Clinton pen Fuller Theological Seminary, School of World Mission ah Leadership Professor ahihi.