Myanmar Assemblies of God General Council

First Row(Left to Right): Rev. Hla Myint(General Secretary), Rev.L. Yaw Han (Superintendent), Rev.Go Num(Vic-Superintendent), Rev. R. Dee Ram(Treasurer)

Second Row(Left to Right): Rev. Tan Kee (Member), Rev. Dong Chaw(Member), Rev. Khai Khan Suan(Member), Rev. Ngwa Si Tar(Member), Rev. Kyi Lynn(Member)

Kawlgam AG GC Kiteelna leh Kiapna Nuamtak in Kizo

Tunung March 30 ni'n kumpite panmun ki-apna neih uh bangin Kawlgambup AG bulpi ahi, General Council of Assemblies of God in zong makai luiteng leh makai thak ding teng panmun ki-apna nei thei uh ahih manin lungdamhuai mahmah ahihna thu tawm kong pulak nuam hi. A beisa-ah Dr.Thuam in zong tawm hong leep ngei-in nei ing. Tutunga ki-apna pen a hamsa dek ding tawh kibang man ta leh ahun ciangin bangmah buaina dang om lo-in March 31,2011 ni-in bawlthei ta uh hi.

Tua adingin D.C-4 Tamu a kiteelna mankhit phetin Superintendent asem, Rev.Go Za Nang leh Rev.Dr.Thuam Khan Thang te Yangon ah nawhsatakin paisuk pah uh hi. Hih siapite geelin Yangon a om sungun Zomite pawlpite ah zong thapiakna a tuamtuam nei thei uh a, Dr.Thuam zong Malay lamah paisuak hi. Sia Go Nang ahih leh zanhal ni'n Kawlpi hong ciahto khin ta hi.

Tutung ki-apna tawh kisai-in; Kawlgam A.G in zum, Office a kinei nai lo na himawk ahih manin innmun, taih khan zongpah uh a; No.200,208,4th.Floor, 35 St.Botataung ah saap dingin kipsak uh a, tuatak ah
hunbit a tuu ding, Rev.L.Zawhang (Superintendent)te leh Rev.U Hla Myin (Secretary) te akipan sumkem dongin hunbitin tuu ding uh hi.

Hih taihkhan pen Mihau khat aa' hi a, mi kician sinsen leh zum thupi a zat dingbek a a phal ahih manin zatnuam mahmah ding ci uh hi. Tua pen tutung a makai thak ding tengin a zon kawikawi uh ahi hi.

PIAKKHIATNA MALEEP PAWLKHAT (ka phawkkhak pak teng):-

1. Rev.Dr.Dam Suan Mung (Mungtawng) in; Superintendent sabuai dingte om nai lo ahih manin a lei nading piakhia pah a, teng 3 val man piakhia a, leipah uh hi.

2. Rev.Dr.Go Chin Zam (Zambawi-O.M) in; Sualtung pah ding special a hoih mahmahte a khaan bup a phah zawhna dingin sum teng 3 val man piakhia hi.

3. Rev,U Chit Khin (Korea-Myanmar) Yangon a Mission nasem leh Pawlpi a neipa in; Aircon box mal 4 bulhsak pah hi.

4. Tuaban-ah tutnung a G.C kiteel khit phetin i sanggam/behte, Pasian a it mahmah mihau khat in G.C Makai thakte in zumvai tawh kisai a kisam banga zat dingin, Ks.300 lakh. piakhia pah hi, cih zong kiza hi.

MAKAI LUITE IN VAN PAWLKHAT AP CIAT UH:-

1. A beisa kum 21 sungah makaipi asem Rev.U Myo Chit in, zong zum sung vanzat pawlkhat mah ap ci hi.
2. Thuvaanpi ahi, Rev.Ngua Yi Zaw in zong ama zat zel ahi, Motor khat leh zum vanzatte a kimtakin ap cih kiza hi.

3. Sum keempi, Rev.Suak Za Go (Gobawi) in zong, zum sabuai/tutphahte leh a sumkepte Ks.12 lakh val ap cih kiza hi.

A beisa hunkhat lai-in, thutuam tuam ging ta leh vaibuai dang om lo-in, lungkimhuai takin panmun ki-ap theih khia ta uh ahih manin I lungdampih hi. A ki-ap ding ni'n zong makaipi Rev.U Myo Chit in makai
thak dingte thupha piak ngiat a, Pasian in lemsa ta hi, zong kong muang a, a kulna munah zong kong panpih ding hi, ci-in a thukimnate genkhia a, ki-lungkim mahmah hi, cih thu kiza hi.

Note: (A.G tawh kisai internet/E-mail ah kizop tuah theihna dingin sia Sianpu leh makai pawlkhat in group mail hong bawlkhia khin ta uh ahih manin mailamah biaknavai tawh kisai thu tuamtuamte tua tungtawnin
siangtho takin i kizatuah thei ta ding hi, cih zong i kipulak kawm nuam hi. Tua group mail dingin: ZomiAG@yahoogroups.com, hih ahi hi. A.G tawh a kizom, a diakdaikin A.G sungah hunbit nasem khempeuh leh a lunglut diakteng in na na kizop dinguh zong a kigen i hi pah hi).

Piakkhiatna tawh kisai ahi zongin kituah lohna a om leh a cianzaw a theite in hong gen ta un. Ih lungdamlua mahmah ahih manin zakna banga hong tangko ka hi hi. Topa'n makai thakt dingte hong makaihsak hen la, a mipite zong nungzui hoih hong suaksak ta hen! Amen.

Deihsak thupuak,

Peter Khampu.

AG Pawlpi' Upna Bulpite

ASSEMBLIES OF GOD PAWLPITE’

UPNA BULPITE

1. LAI SIANGTHO: Thuciam Lui leh Thuciam Thak in mite’ tunga Pasian’ hong kilahkhiatna hi-a, Pasian lungsim pan Kha Siangtho hu muama kigelh ahihmanin khialhna kihello, up ding leh zuih dingin a kicing Pasian’ Kammal ahi hi (2 Tim. 3:15-17; 1The. 2:13; 2Pi. 1:21).

2. PASIANA:                                                                                                               A maan Pasian khat bek in ‘Ama’ thu-a om tawntung “KEIMAH” ci-in amah leh amah hong kilakkhia hi. Pa, Tapa leh Kha Siangtho-in zong hong kilak hi. Pa, Tapa leh Kha siangtho To thum Pasian khat ahi hi (Thkn. 6:4; Is. 43:10, 11: Mat. 28:19; Lk. 3:22).

3. JESUH KHRIH:
Topa Jesuh Khrih in a om tawntung Pasian’ Tapa ahi hi. Lai Siangtho in;
a. Kha Siangtho tawh nungak siangtho sung pan mi bangin a suahkhiatna,
b. Mawhna nei lo-a nuntakna,
c. Na lamdangte a bawlna,
d. Eite’ taang a singlamteh tunga a hong sihna,
e. Sihna pan a pumpi mah mah a a thawhkikna,
f. Pasian taklamah minthanna a ngahna leh
g. A pumpi mahmahin hih leitungah minthanna leh vangletna tawh hong paikik dinga, kum 1000 uk ding ci-in hong gen hi (Mat. 1:23; Lk. 1:31, 35: Heb. 7:6; 1Pi. 2:22; 20:38; 2Kor. 5:21; Mat. 28:6; Lk. 24:39; 1Kor. 15:3, Sawl. 1:9, 11; 2:33; Fil. 2:9, 11; Heb. 1:3; mat. 24:29, 30; Mang. 19:11-15).

4. MI:                                                                                                                          A kibawlcilin mihing in hoihin, thumanin kicing hi; banghanghiam cihleh Pasian in, “Eite’ lim leh mel sunin mi bawl ni,” ci hi. Ahih hangin mihing in ama’ teeltawmna tawh hong mawhna, pumpi sihna bek hilo, Pasian tawh kihenna ahi kha sihna zong hong thuak hi (Pian. 1:26, 27; 2:17; 3:6; Rom. 5:12-19).

5. GUPKHIATNA:
Pasian’ Tapa Jesuh Khrih sisan kibuakna sung bekah Gupna leh mihingte kihotkhiatna nading lametna om hi. Mawhna maisakna in Jesuh Khrish sisan hang bek hi (Efe. 1:7; Heb. 9:22).

Gupkhiatna ngah nading: Kisikkikna tawh Pasian lam zuanna Topa Jesuh Khrih upna hangin Pasian hehpihna tawh Gupna kingah hi (Lk. 24:47; Joh. 3:3; Rom. 10:13-15; Efe. 2:8, 9; Tit. 2:11; 3:5-6).

Gupkhiatna ngahlam kilatkhiatna: Kha Saingtho mahmah I lungsim sunga i kha tawh tetti hong panna pen Gupkhiatna ngahlam, sunglam kilatkhiatna ahi hi (Rom. 8:16). Pualam kilatkhiatna pen thumaanna leh siangtho taka nuntakna ahi hi (Efe. 4:24; Tit. 2:12; 1 Joh. 3:2).

6. PAWLPI NGEINA:

a. Tui sungah kiphumna: Lai Siangto sungah tui sunga kiphum  
                 dingin hong kisawlhi. Thu-ummi, gupna ngahsa khempeuh kiphum
                 ding hi. Mawhna sungah Jesuh Khrih tawh sikhawma, dikna leh  
                 nuntakna thak tawh nungta dingin Jesuh Khrih tawh a thokhawm
                 ka hi, cih mite mai-ah lahkhiatna-in tuiphumna kizang hi (Mat.
                 28:19; Mk. 16:16; Sawl. 10:47, 48; Rom. 6:4).

b. Neekhawm: Khomun leh lenggah tui zanga Topa nitak-an  nekkhawmna      
     in Topa Jesuh Khrih nuntakna I neihna lima hi hi. (2Pi. 1:4). A thuakna     
     leh a hong sihna phawkna leh a honng pai kik nading genkholhna   
     (1Kor. 11:26) zong hi-a, a hong paikik mateng thu-um mi khempeuh in   
     a bawl zel dingin hong vaihkhak hi.

7. KHA SIANGTHO SUNGA KIPHUMNA:                                                              I Topa Jesuh Khrih hong sawlna bangin thu-ummi khempeuh in a hong ciamsa ahi Kha Siangtho leh mei sungah kiphumna neih theih hi-a, lamet cinten ding leh zon vinven ding ahi hi. Nungzuite leh Pawlpi masate hun lai-in hih pen a neihkim uh ahi hi. Tua tawh nuntak kalsuanna leh nasep kalsuanna leh nasepna dingin vangletna hong kipia-a, tua tawh Pasian nasepna dingin Kha Siangtho letsong (thupha) te zong hong kipia hi (Lk. 24:49; Sawl. 1:4, 8; 1 Kor. 12:1-13). Hih pen pianthak khit cianga hong piang hipanna, pianthakna tawh akibang hilo hi (Sawl. 8:12-17; 10:44-46; 11:16; 15:7-9).

8. KHA SIANGTHO SUNGAH KIPHUMNA A KILATKHIATNA: Thu-um mite Kha Siangtho sungah kiphumna in Pasian Kha Siangtho hong sawlna bangin kamtuam pauna tawh hong kilang masa hi (Sawl. 2:2-4). Hih sunga kamtuam pauna leh thupha khata hong kipia kamtuam pauna (1 Kor. 12:4-10, 28) pen a dan a kibat hangin a deihna leh a zatna kilamdang hi.

Kha siangtho tawh kiphumna tungtawnin:

a.       Kha Siangtho vangletna tawh lim leh nalamdangte piangin, lungdamna thu kizelsak ding hi (Mk. 16:15-20; Sawl. 4:29-31; Heb. 2:3-4).

b.      Pasian biakna ah lungdamna leh kicinna omsak ding hi (1Kor. 2:10-16; 12:13; 14:1-40).

c.       Thuciamthak hun Khrih pawlpi taktak ahih theih nadingin Kha Siangtho gah leh letsong (thupha) te zangin Ama’ nasepna lawhcingsak ding hi (Gal. 5:22-26; 1Kor. 14:12; Efe. 4:11-12; Kol. 1:29).

9. SIANTHONA:                                                                                  Sianthona icih in a sia tawh kikhenkhia-a, Pasian lam belh cintenna ahi hi (Rom. 12:1-2; 1Thes. 5:23; Heb. 13:12). “Tua sianthona a om kei leh kuamah in Pasian a mu thei kei ding hi” (heb. 12:14). Thuummi in Khrih sihna ah kikhawmin, a thawh kikna ah thokhawma nungta ahihlam kithei-a, tua pum khat suahkhopna thu nisimin ciamtehin, Kha Siangtho’ uk dingin a pumpi tung nate khempeuh a piak tawntung ciangin tua sianthona hong piang thei hi (1Pi. 1:14, 16; Rom. 6:1-11,13; Gal. 2:20; Fil. 2:12, 13; 1Pi. 1:5).

10. PAWLPI LEH A MAWHPUAK:                                                      Pawlpi I cihin Jesuh Khrih, Honpa leh Topa-a a sang khempeuh hi-in, Kha Siangtho tawh Pasian tenna mun ahi hi. Tua Pawlpi in Khrih sawlna bangin leitung khempeuhah Lungdamna Thu kizelsak ding a mawhpuak ahi hi (Efe. 1:22; 23; 2:22; Heb. 12:23; 1Tim. 2:4; Mat. 28:19; Mk. 16:15).

11. NASEPNA
I Topa in Lai Siangtho banga semkhia dingin hong sama, thu 3 tawh Palwpi makaih dingin hong geelsak hi.

(1) Leitung bupah Lungdamna Thu taangko ding (Mk. 16:15-20).
(2) Pasian bia ding (John. 4:23, 24) leh
(3) A tapa lim a sun mi siangthote piangsak ding (Efe. 4:11-16).

12. CINA DAMSAKNA:                                                                    Lungdamna Thu sungah Pasian’ cina damsakna in a kitangsam thu khat ahi hi. Khrih in gimna tawlna tampi thuakin hong sihna in kha aading bek hi loin pumpi damask nadingn zong hi-a, thu-um mi khempeuh ngah theih ahi hi (Isa. 53:4, 5; Mat. 8:16, 17; 1Pi. 2:24; Jeim 5:14-16).

13. THUPHA LAMETNA:                                                                                    Khrih sungah a ihmusa mite thokikin, Topa hong pai dong a hinglai mite tawh kihelkhop nading hun ahi misiangthote laktohna (Rapture) in a hong tungpah thei ding Pawlpi’ Thupha lametna ahi hi (1Thes. 4:16-17; Rom. 8:23; Tit. 2:13; 1Kor. 15:51, 52).

14. KHRIH KUM TUL MAANNA:                                                         Khrih hong paikik ciangin eite lametna ahi mi siangtho laktohna om dinga, tua khit ciangin minthanna leh vangletna tawh leitungah kum tul khat maang dingin, mit-a muhin hong kumsuk ding hi (Zekh. 14:5; Mat. 24:27, 30; Mang. 1:7; 19:11-14; 20:1-6). Hih kum tul manna sungah Israel gam in hotkhiatna ngah dinga (Ezk. 37:21, 22; Zef. 3:19, 20; Rom. 11:26, 27), leitung bupah nopna om ding hi (Isa. 11:6-9; Late 72:3-8; Mat. 4:3,4).

15. THUKHENNA NUNUNG PEN:                                                                   Migilo a sisate kithosak kikin, a gamtatna bangun thukhenna nunung pen thuak ding uh hi. Nuntakna laibupi sunga a min omlo peuhmah dawimangpa leh a nungzuite tawh, sahang leh kamsang zuaute tawh a tawntung gimna thuak dingin kaat leh mei lipi sungah kikhia ding hi. Tua pen nihna sihna ahi hi (Mat. 25:46; Mk. 9:43-48; mang. 19:20; 20:11-15; 21:8).

16. VANTHAK LEH LEITHAK:                                                                Hih leitung beisiang dinga, Vanthak leh Leithak piang ding hi (Mang. 21:1). Vanthak leh Leithak ah Thumaanna in uk tawntung ding hi (2Pi. 3:13). 

BULPI TE KISIA LEH

BULPI TE KISIA LEH

Bulpi te ki susia leh midik ten bang cih thei ding ahi hiam? Late 11:3

A ki piang sak na khempeuh bulpi nei in ki bawl hi. Hih leitung zong huih awngthawl lak ah kikhai tawh a ki bat hang, Pasian in bulpi nei-a abawl ahihi. (Job 38:4). Kha thu zong bulpi/tawphah nei-a kilam ahihi. Tua bang mah in kipawlna tuamtuam te zong bulpi nei vive ahihi. Bulpi cih ciangin, thuletcian, thubulphuh cih leh, tua thubulphuh a lenkip makai te cih nam nih in om hi.

Khristian upna ah “Bulpi” Jesu Khrist leh a kammal hi-a, hih pen a kikhel ngeilo/ki sia theilo ahihi.( Heb 13:8;Mtt 24:35). Bulpi dang khat pen, “Makaite” ahihi. Hih makai te nam 5 in kimu hi: Kamsangte, Sawltakte, Evangelist te, Pastor te leh Laihilh sia te ( Eph 4:11). Lai Siangtho lui ah, Kamsang, siampi leh Kumpi te a bulpi uh ahihi. Lai Siangtho lui ah hih makai thum te kisia leh a nungzui, a khutnuai gammi te zong kisia pah uh hi. Lai Siangtho thak hun ah zong a tunga makai nam nga te kisia leh pawlpi kisia ding ahihi.

Bulpi ki susia cih ciangin: Upna pai khialna, Nuntakna manlohna cih te ahihi. Pawlpi sungah siapa/makai te upna paikhial leh pawlpi mite zong paikhialh pih ding hi. Anun takna (character) kisia leh mite zong kisia ding hi. Inn sungah zong nu-leh-pa nuntakna kisia leh tate kisia ding hi. Nitum na lam gamte ah naupang kisia te a tamzaw inn sungah nu-leh-pa kilemlo, kikhen te hangin piang hi. Naupang khatin, kamtawh genna sangin akiim a amuh uh thu tawh nungta zaw hi cih mipil ten gen hi.  tua ahih man Naupang te in inn sungah “thunei” et-the ding (authority figure) kisam hi.

Ka gen nop bulpi in. “Pasian pawlpi ah makai na hi-a, business (sum bawlna) khat ah makai na hi-a, leitung kumpi nasepna khat peuhpeuh ah makai na hi a, inn sungah nu-leh-pa dinmun om na hi zongin, nang pen na theih loh kal in mikhat in/na tate/ na nungzui ten hong et-teh gige ahih lam thei in”, ci-in Dr. J.R Clinton[1]  in gen hi. Midang te zawhna pen, (sum tawh huhna, ngaihsut piakna, palai sepna (sponsor) cih bang tuamtuam om a, tua te lak-ah mi te et-teh limpha suahna tawh zawhna (influence) sawt ki mang pen hi.

[1] Dr. J.R Clinton pen Fuller Theological Seminary, School of World Mission ah Leadership Professor ahihi.

Welcome to Zomi Assemblies of God

Welcome to the Zomi Assemblies of God International Blog!
If you belong to the same faith or willing to be a part of the network for the greater harvest, please do join us!